The Trouble With Good Beginnings novel Chapter 13

“ALERON?”

Nangingiting napamulat siya matapos marinig ang malambing na pagtawag na iyon ni Holly sa pangalan niya. Sa pagbukas niya ng mga mata ay ang maamong mukha kaagad nito ang bumungad sa kanya. Nakayuko sa kanya ang dalaga nang mga sandaling iyon habang nakahiga naman siya. Ang mga hita nito ang pansamantalang naging unan niya.

Nahigit ni Aleron ang hininga sa sayang lumukob sa puso niya. Ni minsan ay hindi niya natandaang naranasan niya ang magkaroon ng ganoong pakiramdam, ng ganoong uri ng kapayapaan na tumatagos hanggang sa kaluluwa niya.

Nasa parke sila nang mga sandaling iyon ni Holly. Matapos masukatan ng traje de boda ang dalaga ay doon na sila dumeretso. Kung hindi niya lang nakikitang pagod na ito ay sa ibang lugar niya sana ito dadalhin at doon sila magpi-picnic. Ang kaso ay alam niyang wala pa halos pahinga si Holly dahil magdamag nitong tinapos ang manuscript nito pagkatapos ay inasikaso pa nila ang ilang bagay tungkol sa nalalapit nilang kasal. Kaya hindi na rin siya tumanggi nang isuhestiyon nitong sa parke sa village nila na lang sila tumuloy.

“What is it?”

Holly gently cupped his face. “’Wag kang mawawala, ha? Hindi ko kaya. Dahil ikaw ang nobela ng buhay ko. You’re my beginning, my middle and my ending. You are the pieces of every heroes that I write. I can’t imagine my heroines without you.” Napailing pa si Holly. “I can’t imagine my life without you.”

“Sir?”

Disoriented na bumalik ang mga mata ni Aleron sa kanyang harap nang marinig ang boses na iyon ng executive assistant niyang si Luke. Napatingin siya sa mga inilapag nitong papeles sa center table. Mayamaya ay napabuntong-hininga siya. “Sana ay tinawagan mo na muna ako bago ka pumunta rito. I was about to go back home anyway. Hindi ko lang naipaalam sa ’yo kaagad dahil biglaan.”

“I’m sorry, sir.” Mapagkumbabang sagot ni Luke. “Dati-rati po kasi ay kabilin-bilinan ninyong dumeretso na lang ako rito at huwag nang tumawag pa.”

“Right.” Napahawak si Aleron sa noo. “I forgot.”

Kung sabagay ay napakarami niya nang nalimutan simula nang umalis siya ng Pilipinas. Nalimutan niya rin kung paano ibabalik sa dati ang buhay niya. Sa mismong araw dapat ng kasal niya ay ginamit niya ang private plane niya patungong Jacksonville sa Florida kung saan nakatira ang ilan sa mga kamag-anak ng ama. Doon siya nagtago. Pero kahit na kailan ay hindi siya nakahanap ng katahimikan sa lugar na iyon. Dahil paulit-ulit siyang minumulto ng mga alaala ni Holly.

Eksaktong anim na buwan na sa araw na iyon mula nang dumating siya sa Jacksonville. But his heart and soul were left in the Philippines, they were stuck there. Sinubukan ni Aleron na bigyan ng pagkakataon noon si Holly para umamin pero hindi nito ginawa. Kaya doble ang baon niyang sakit nang umalis ng sariling bansa. Tumuloy siya sa resort na pagmamay-ari ng pinsan niya roon. Araw-araw, pakiramdam niya ay isa siyang zombie. Buhay ang katawan pero hindi ang puso.

Kung tutuusin, sobra-sobra ang sinapit nila ni Athan kay Holly kaya hindi niya maintindihan kung bakit hinahanap-hanap niya pa rin ang dalaga, ang nag-iisang dalaga sa mundo na may kapasidad na buhayin muli ang puso niya. Si Holly rin ang dahilan kung bakit babalik na siya sa Pilipinas kinabukasan. Dahil sa kabila ng lahat ay gusto niya pa rin itong makita at mababaliw na siya ng tuluyan kapag hindi niya pa nagawa iyon agad. Sinubukan niyang lumayo pero anim na bwan lang ang itinagal niya. Ganoon siya katanga.

Mabuti na lang at maunawain ang mga empleyado niya sa Williams Group. Sa nakalipas na mga bwan ay inihahatid mismo ng personal ng executive assistant niya ang lahat ng reports at dokumentong kailangan niyang pirmahan.

“I came here not just for the monthly reports, sir. But also for these.” Mula sa attache case ay naglabas si Luke ng isang puting sobre. “May limang bwan na daw po mahigit simula nang may isang babae na nagpakilalang Hailey Lejarde na nag-abot niyan kay Ruth na sinadya kayo sa office nyo.” Tukoy ni Luke sa executive secretary ni Aleron. “Pero noong isang araw lang po naalala ni Ruth. Ipinapaabot niya po sa akin ang paghingi niya ng tawad, sir.

Inilagay niya daw po sa drawer niya ang sulat at nalimutan niya na daw pong ipaalala noong mga nakaraang bwan dahil sa magkakasunod na meeting na inasikaso niya sa mga kliyente.” Napailing si Luke. “Noong naghalungkat siya sa drawer niya ay saka niya lang daw po iyan natandaan.”

Kumunot ang noo ni Aleron. Inabot niya ang sobre mula kay Luke. Sa likod niyon ay may nakasulat na Hailey Lejarde. Anong posibleng pakay sa kanya ng kapatid ni Holly? Kung mismong si Ruth ang inabutan nito ng sobre, nangangahulugan iyon na alam ni Hailey kung saan naroroon ang main office niya sa loob ng mall dahil doon rin nakabase ang opisina ng sekretarya niya. Maraming branch sa Pilipinas ang Williams’ Mall pero sa Caloocan siya mismo nag-oopisina. Paano nalaman ni Hailey iyon?

Sinenyasan ni Aleron na lumabas na muna si Luke bago niya binuksan ang sobre at binasa. Dalawang puting papel ang mga iyon. Ganoon kahaba ang sulat.

Mr. Williams,

Nagtataka ka siguro kung paano ko nalaman ang main office mo. That’s because I know everything about you. I got all the information from Celine, one of my friends. Her father, if you remember, happened to be one of your company’s board members. Kaya bago ako pumasok sa buhay ni Athan, alam ko na ang lahat tungkol sa kanya kahit hindi niya binanggit ang koneksyon niya sa ’yo o sa negosyo nyo.

Yes, Mr. Williams. It was me who dated your brother. It was a lot to explain, really. I wanted to talk to you in person the moment I came back in Manila but your secretary just won’t tell me where you are. Kaya aasa na lang ako na sana ay buhay pa ako pagkatapos mo ‘tong mabasa para sa pagkakataong iyon, tama ang taong masisisi mo, masusumbatan at mapaghihigantihan mo. I used Athan but then again, I also used Holly. I was a bitch. My target was really your brother. I’m broke and I found out he’s rich. Kahit nagkita na kami minsan sa bar, ni hindi niya ako makuhang tingnan bilang Hailey so I pretended to be my twin.

Noong panahong iyon, nagrerebelde rin ako dahil hindi ko pa nakukuha ang mana ko at nagsara ang mga negosyong binuksan ko. When Athan fell in love with me, with Holly that I supposed you thought I was, he gave everything to me. Pero maniwala ka sanang siya lang ang una’t huling lalaki na ginawan ko ng gano’n. Athan’s a nerd. He liked things that I don’t. Magkaiba ang mga interes namin sa buhay pero minahal ko siya, Mr. Williams. Dahil marunong siyang magmahal. Kakaiba ang puso niya.

Ginusto ko nang aminin sa kanya ang totoo pero nalaman kong may sakit ako. I wanted to shield him from the pain, that’s all I could ever think of at that moment. I have a terminal cancer. I used my friend to get rid of him and then I went to the States to undergo treatments. Alam kong mahirap maintindihan ang mga rason ko, patawarin mo ako. Even Holly wouldn’t understand this right away.

Hindi ko alam na nagpakamatay si Athan. Had I known, I would have left everything in L.A and be here the moment I found out. Patawarin mo ako, Mr. Williams. Alam kong kulang na kabayaran iyon pero kapag nagkita tayo, saka mo na lang ako bawian. But I assure you, Holly is innocent. She didn’t know about Athan. Anuman ang mga sinabi niya sa ’yo, totoo lahat ‘yon. That’s Holly. She never lies.

Hindi na nagawang ituloy ni Aleron ang pagbabasa. Agad na bumalik sa isipan niya ang mga ngiti ni Holly, ang mga emosyon sa mga mata nito, ang mga sinabi nito noong magkasama pa sila. Napaawang ang bibig niya kasabay ng pag-uulap ng mga mata niya. Ibig sabihin ay… totoo ang lahat ng iyon?

Pero sino ang lalaking nahuli niyang kahalikan ni Holly noong gabi bago ang kasal? Posible kayang si Hailey uli ang babaeng iyon? Napatayo siya. Natetensyong naihilamos niya ang palad sa mukha. God... Paano kung totoong mahal siya ni Holly at nagkamali nga lang siya ng hinala dahil nagkataong ibang babae ang pagkakakilala ni Athan kay Hailey? Anong gagawin niya?

INISANG-LAGOK lang ni Holly ang lamang alak sa kanyang baso habang pinanonood ang nagkakasiyahang mga kaanak sa paligid. Nang may dumaang waiter ay kumuha pa siya ng panibagong wine glass. Silver wedding anniversary ng tito Rony at tita Janet niya nang araw na iyon. Nakababatang kapatid ng kanyang ama si Rony.

Nagmukhang reunion na ng buong angkan ng Lejarde ang selebrasyong iyon. Ngayon na lang sila nagkita muli matapos ng libing ni Hailey may tatlong buwan na ang nakararaan. Hindi nakadalo ang kanyang mga magulang kaya siya ang nagsilbing representative ng kanyang pamilya. Mahigit isang linggo nang nasa England ang mga magulang ni Holly para magbakasyon. Inalok siyang sumama ng mga ito pero nagpaiwan siya dahil hindi siya nakakasiguro kung gusto nga ba siyang makasama ng mga ito.

Hawak na ng ama ang oras nito. Ibinenta na nito sa ama ni Cedrick ang kalahati ng shares nito sa kompanya kaya shareholder na lang ito. Ang ama na ni Cedrick ang tuluyang namamahala roon.

Simula nang yumao si Hailey ay napilitan siyang sa mansyon na muna nila manirahan sa pakiusap ng mga magulang. Pero hindi sila nagkaroon ng pagkakataong makapag-usap dahil para bang iniiwasan siya ng mga ito sa hindi niya malamang dahilan. Bahagyang naghigpit ang mga ito sa kanya pero hanggang doon na lang iyon. Binigyan siya ng mga ito ng driver cum body guard sa bawat pupuntahan niya.

Her parents in a way had become paranoid. At nauunawaan niya naman iyon lalo na ngayong siya na lang ang natitira sa mga ito. Ang hindi niya lang maunawaan ay ang kakaibang kalamigang ipinakikita ng mga ito sa kanya. Napabuntong-hininga siya.

Why do I keep witnessing miracle happen to almost everyone around me except to me? Puro matagumpay ang mga pagsasama ng mga elders kung ituring sa angkan ng mga Lejarde. Hayun nga at nasasaksihan pa iyon ni Holly nang mga sandaling iyon. May favoritism ba ang mga kupido? Mayamaya ay napailing siya. Siguro ay hindi lang talaga para sa kanya ang pag-ibig.

Kumunot ang noo niya nang makita si Valeen, ang anak ng tito Rony niya, na papunta sa tabing-dagat, malayo sa lahat. Nag-iisa lang ito roon. Mula sa kinauupuan ay tumayo si Holly at sinundan si Valeen dala ang kanyang wine glass, tutal ay hindi na rin naman siya komportable sa mga nangyayari sa paligid. Gusto niyang magsaya, gusto niyang makisaya dahil ganoon ang dating Holly, ganoon ang pagkakakilala niya sa sarili. Pero kahit katiting na saya ay wala siyang makapa sa puso niya.

Naglalakad na siya papunta kay Valeen nang mayroon pang mga pinsan niya na sumabay sa kanya. Sina Julienne, Clover, Zai at Jazeel ang mga iyon. Marahang nginitian niya ang huli. Hindi na sila nagkaroon pa ng pagkakataong makapag-usap ni Jazeel noong mga nakaraang bwan dahil hindi pa siya handang buksan ang damdamin. But Jazeel, being her best friend and cousin rolled into one, understood. Alam niyang gaya ng dati ay naghihintay lang itong maglahad siya rito.